TIPAIMUKH MLA NI LAI LE INTENDING CANDIDATE DR. CHALTONLIEN AMO ROPUI TAKIN HMARBIEL A LUT

 

Zani (Dated 16/02/2022) khan Tipaimukh MLA ni lai le BJP Intending candidate Pu Chaltonlien Amo chu Hmarbiel a lut. Khuo iemani zat anthawk mipui a sangtelin Zawlliensuo lampetah an lo hmuok a. Motorin a hmatieng le hnungtienga sawmin Parbung khuo an panpui. Mipui khek rawl chun, ''Pu Chalton damsawt raw se! BJP Jindabad!'' ti le hla an phuokpek haiin Hmar khawvel a dengsuok hne hle.

Sinlung organic FPC collection centre Parbunga BJP 55/AC Tipaimukh mandal hai organised nain Pu Amo hi hunser pawimaw tak el hmangpui a ni a. Mipui, Pastor le Pathien hmaah intiemkamna khawm a nei nghal a nih. 

Inkhawm hunser hi Tv. Hrilhmingthang Buhrilin a keiṭhuoi a. Hun hmasa takah Rev. Ruolneisangin Pathien kuomah ṭawngṭaina neiin lawmlutna le inhmelhriettuonna Pu Lalramsan Sungte, Secretary BJP Tipaimukh Mandal anthawk ngaithlak a nih.

Hi zoah hin Pu. Lalringum Inbuon, President BJP Tipaimukh Mandal anthawk BJP Pledge Points 16 hai chu mipui hrietah puongzarna a nei a. Rev. Joe Sanghmingthangin Pathien le mipuihai hma bulah Tipaimukh biel mipuihai hmasawnna dinga BJP Tipaimukh Mandalin a riruong hai kut ngeia zieka intiemkamtirna hunser a nei zovin Pathien kuomah malsawmna le ṭawngtaipekna a nei.

 Pu Amo in thu a hrilnaah chun, "Congress party maksanin biel mipuihai hmakhuo ngaina lei le tuta term sunga delimitation um ding ngaipawimawna leiin BJP hi pei naw tak pumin a zawm thuhai a hril a. Term hmasak khawm khan BJP party anthawk fielna a dawng a. Nisienlakhawm, a hnawl thu hai a hril bawk a nih.

Tuta term ruok hin chu Central BJP le State BJP hai anthawk fielna a dawng nawn nawk chu biel ṭhe hran ding a ni bawk leh, biel mipuihai rawng nasa nawk zuola central thahratna ringsana a bawl theina ding thu hai a hril a nih.

Pi. Ramsang Amo anthawk khawmin thuhril tawi ngaithlak a ni a. Pi Amo in kum thar 2022 a Pathienin baibul chang thar a pek Isai bung 43 chang 18 anthawka 20 chen mipui pungkhawmhai hmaah tiem langin lungril thar le ngaituona thar hai an nei thu a hril a. A hril peinaah chun hnam dang haiin an mi sirdenahai lei hin Hmar hnam hi a lainatzie thuhai a hril sa bawk. Rengkai a MDC biel ei chan nasan hai khawm hi MLA ei tling naw laia mi a ni a. MLA constituency pakhat chau ei nei khawm hi invawi ding le tuta term sunga seniority a pawimawzie hai chu ngaituo ṭha dingin mipui fekhawmhai a ngen a. Vote inchawk ang dama mi ṭhenkhatin an intumnahai chu khel a ni thu hai Mipui le Pathien hma bulah a puongsuok a. Chun, hnam politics inhnel ding le hnamdang haiin hmar var an hnu an ti hlak kha var khal tang ei tiu, tiin. Chu le inruol chun MLA fund mipui chanpuol hi mipui kutah an pek ta ding thu hai a hril sa bawk a nih.

A hril pei naa chun Lotus tlangrama par ngai naw an tia chu a par theina dinga hma lak pui dingin mipuihai a fiel a nih.

Hun khar ṭawngṭaina Pastor Sumthangsuoin a nei zovin Senvon khuo an pan nawk nghal thu ei dawng bawk a nih.